Компанијата „Пофикс“, чии простории денеска гореа во големиот пожар на излезот од Тетово, преку објава на Фејсбук соопшти дека причините за пожарот сѐ уште не се познати, но според нив, она што е од витално значење е фактот дека не биле загубени животи.

„Во оваа прилика јавно им се заблагодаруваме на противпожарните екипи, на градоначалникот на Тетово и на полицијата, кои максимално работат на терен, како и на граѓаните и бизнисмените на Тетово кои се вклучија во гаснењето на пожарот“, стои во соопштението на компанијата.

Екипа на армијата за заштита од атомско, хемиско и биолошко оружје денеска констатирала дека во воздухот нема штетна концентрација на отровни гасови, а градоначалникот на Тетово Билал Касами најави дека и утре ќе продолжат да ја следат состојбата. Во интервенциите, во кои учествуваа противпожарни единици од Тетово, Скопје, Куманово и Кавадарци, тројца пожарникари беа полесно повредени.