Поради пожарот во дискотеката „Пулс“ во Кочани во кој загинаа 59 луѓе, се одложуваат двата шоуа „Глумците пеат“, кои требаше да се одржат на 8 и 9 април во Македонскиот народен театар (МНТ), објавија организаторите.

„Ова шоу постои да носи радост и заедништво, но во моментов никој од нас нема сила за тоа.
Новите датуми ќе ги објавиме набрзо. Купените влезници ќе важат за новите термини“, се вели во соопштението.

На „Глумците пеат“ е предвидено да настапат триесетина врвни актери од сите генерации, придружувани од биг-бенд составен од извонредни музичари. Режијата е на Дејан Пројковски, музичките аранжмани на Бобан Мирковски, кореографијата на Олга Панго, а под диригентската палка на маестро Љупчо Мирковски. Култни филмови со кои пораснале многу генерации ќе бидат тема на „Глумците пеат“.