Денот на шегата – 1 април денеска ќе биде одбележан со повеќе настани. Познат е како ден кога најмладите се маскираат со ликовите на омилените јунаци од цртаните филмови и се бираат најдобрите маски.

Речиси во секоја општина се организираат манифестации со кои се одбележува Денот на шегата. Под слоганот „Маски, смеа, рингишпил- дојди во Шеговил!”, Општина Кисела Вода организира голема забава под маски за најмладите пред салата Расадник каде ќе биде поставен забавен парк со најразлични реквизити, ќе има кловнови и аниматори, а за музичкиот дел ќе бидат задолжени „Поточиња”.

Априлијадата во општина Бутел ќе започне во 10.30 часот на плоштадот „Слобода“, каде како што се најавува за сите присутни деца ќе има многу музика, забава, детски претстави и најубави детски маски.

Со многу забава, музика, маски и смеа ќе се одбележи 1 април низ Скопје

1 април не е национален празник, но секаде се прославува како ден кога многумина прават разни шеги. Во некои земји како Обединетото Кралство, Австралија и Јужна Африка, шегите се тераат само до пладне. Во Франција, Белгија, Холандија, Италија, традицијата на 1 април е позната како „Ден на рибата“. Вообичаено,  шега е невидливо да се залепи хартиена риба на грбот на жртвата.

Денот на шегата нуди неопходен одмор од монотонијата и можност да се препуштите на малку забава со најблиските.  Во дигиталната ера, Денот на шегата, исто така, доби ново значење со онлајн платформите и социјалните мрежи кои играат централна улога во ширењето шеги и измами.

Додека се впуштате во безопасни шеги и смеа со другите на овој ден, мора да внимавате да не повредите некого и пред се шегата да биде безопасна.