Со петтиот пакет на економски мерки завршува финансиската поддршка за исплата на плати. Ова е последно помагање за исплата на плати, бидејќи се очекува излез од кризата и раст и развој на економијата, најави денеска премиерот Зоран Заев.

На прес-конференцијата на која го презентираше петтиот пакет на антикризни мерки, Заев рече дека Владата останува будно да ги следи состојбите и доколку е потребно да им се најде на компаниите и работниците.

– Ова е последно помагање за исплата на плати и чесно е Владата да ја испрати пораката затоа што очекуваме излез од кризата, очекуваме раст и развој. Ги следиме трендовите и она што се случува во светот, но државата е тука и ќе продолжи будно да следи и да им се најде на компаниите и на работниците и на сите граѓани кои се погодени, рече Заев.

Мерката за плати, како што појасни, се однесува на компаниите кои имаат пад на своето производство од 30 проценти во ноември и во декември во 2020 година и во јануари во 2021 година.

– Компаниите кои покажуваат пад од 30 проценти на нивото работење во ноември и во декември лани и во јануари оваа година во споредба со ноември и со декември во 2019 година и со јануари 2020 година, заслужуваат да бидат помогнати. Има и компании кои имаат профит и се во добар раст и развој, има и компании кои се на прагот на својата рентабилност. Сите се погодени и затоа континуирано сме помагале, продолжуваме да помагаме, истакна Заев.