Од денеска започнува чистење и уредување на двете велосипедски патеки на Водно, за на тој начин повторно да се овозможат оптимални услови за нивно користење и да се зголеми и безбедноста на велосипедистите.

Посветено работиме согласно со програмата на сите активности со кои Водно зелениот штит на Скопје континуирано ќе се одржува со цел да се подобри целокупната грижа за планината. Отпочнавме со санација на велосипедските патеки во должина од 3000 метри, по што продолжуваме со пешачките патеки. Со дополнителна поддршка и проекти настојуваме да ги реализираме многубројните планирани активности за Водно со цел зазеленување, за што најавуваме акција за пошумување од почетокот на месец ноември во периодот на сезоната на садење – истакна денеска градоначалничката Данела Арсовска.

На патеките се врши одстранување на суви дрвја и грмушки, кроење на гранки, отстранување на камења, машинско косење и отстранување на отпадоци. Активностите ги изведува јавното претпријатие „Паркови и зеленило“.