Пo погребот на папата Франциск, сите очи се насочени кон конклавата – тајниот состанок на кардиналите кои ќе се соберат за неколку дена за да изберат нов поглавар на Католичката црква.

Доказ за популарноста на Франциск – енергичен реформатор кој се залагаше за најсиромашните и најранливите, е толпата од околу 400.000 луѓе кои вчера се собраа на последното збогување со аргентинскиот папа во Ватикан и на улиците во Рим.

Многумина од оние кои тагуваат по починатиот папа, изразија загриженост за тоа кој ќе го наследи.

Утре во 9 часот кардиналите ќе го одржат својот петти состанок по смртта на папата, каде што се очекува да го објават датумот на конклавата. Изборот на папата, кој се одвива зад заклучени врати, со векови е предмет на јавна фасцинација.

Кардиналите-избирачи ќе гласаат четири пати на ден сè додека еден кандидат не обезбеди двотретинско мнозинство, резултат објавен на светот со палење хартии што испуштаат бел чад. Луксембуршкиот кардинал Жан-Клод Холерих рече дека очекува конклавата да се одржи на 5 или 6 мај, по деветдневната жалост што завршува на 4 мај.

Германскиот кардинал Рејнхард Маркс изјави пред новинарите дека конклавата ќе трае „само неколку дена“. Тој потврди дека дебатата за следниот папа е отворена, нагласувајќи: „Не е прашање на конзервативизам или прогресивност… новиот папа мора да има универзална визија“.

Повеќе од 220 кардинали присуствуваа на вчерашниот погреб и повторно ќе се соберат денеска попладне во базиликата Санта Марија Маџоре за да оддадат почит на гробот на Франциск.

Само кардиналите под 80 години имаат право да гласаат на конклавата, а моментално ги има 135 – повеќето од нив ги назначил самиот Франциск. Но, експертите не мислат дека ќе изберат некој како него.

Од денеска верниците можат да го посети гробот на папата во базиликата Санта Марија Маџоре, неговата омилена црква во Рим.