Претседателот на Комисија за земјоделие на СДСМ Трајан Димковски денеска се пофали дека Македонија прва во регионот почнува со ИПАРД 3 програмата, на што реагираше Цветан Трипуновски од Комисијата за земјоделство, шумарство и водостопанство од ВМРО-ДПМНЕ.

Димковски се пофали дека политиките на СДСМ создаваат нови и подобри можности за македонските земјоделци и за земјоделството во целина и како прва земја во регионот што започнува со ИПАРД 3 програмата имаме неповратни 97 милиони евра од ЕУ, пари за модернизација и дополнителен развој на македонското земјоделство.

– Со помош на ЕУ создаваме нови можности за многу нови инвестиции за изградба и реконструкција на фарми, оранжерии, амбари, силоси, објекти за земјоделска механизација, објекти и опрема за преработки, за собирање, складирање, ладење, сушење, замрзнување. Нова можност за подигнување на долгогодишни овошни, лозови и други насади, набавка на системи за наводнување, набавка на специјализирани транспортни возила. Нова можност за јакнење на руралните подрачја преку инвестиции за изградба на современа инфраструктура, патишта, пешачки патеки, водовод и канализација – рече Димковски.

Тој најави дека спроведувањето на новата ИПАРД 3 програма веќе почнало од 1 септември, а една од новостите  е авансна исплата до 50 отсто од висината на финансиската поддршка, веднаш по потпишување на договорот.

– Крајната цел е нашите земјоделци, нашата економија да доживее напредок, да доживее развој преку остварувањето на полноправното членство во ЕУ. Бидејќи влезот во ЕУ ќе донесе уште поголеми придобивки и уште повеќе финансиски средства од фондовите, но и пазар од 500 милиони жители. Блокадата на европскиот пат е блокада на милијарди евра помош за македонското земјоделство и тоа не смее да се дозволи – рече Димковски.

Реагираше Трипуновски, кој, како што рече, испровоциран од прес-конференцијата на СДСМ,  ги повикуа јавно да одговорат на неколку прашања.

–  Која е причината што ИПАРД 3 стартува во септември 2023 наместо во март 2022 како што беа првичните најави? Зошто сѐ уште не е склучена финансиската спогодба помеѓу Европската Комисија и РМ? Зашто ги лажете луѓето дека авансно ќе исплаќате средства , кога е потребна банкарска гаранција во износ од 120-130 отсто? Зошто не ја информиравте јавноста за кои случаи и кои се корисниците за истрагите на ОЛАФ во Платежната агенција? Зошто не успеавте да искористите повеќе од 10 милиони евра од ИПАРД 2? Иако се сомневам дека ќе дадете одговор на овие прашања, одговорот е јасен, а тоа е заради вашата неспособност и криминогеност! – порача Трипуновски.