Пратеникот на СДСМ, Миле Талески вели дека опозицијата под заложништво на проруската Левица водат хајка против проектот за изградба на Коридорите 8 и 10д и против компанијата „Бехтел и Енка“.

Изградбата на коридорите 8 и 10Д е најголемиот инфраструктурен проект во нашата држава, вреден 1,3 милијарди евра. 600 милиони евра од овие пари ќе завршат кај наши домашни компании. Гледаме дека со невистини и спинови Мицкоски и ВМРО-ДПМНЕ застанаа против реализација на овој проект важен за развојот на земјата, изјави Талески на денешната прес-конференција.

Претходно, портпаролот на ВМРО-ДПМНЕ Наум Стоилковски информираше дека Владата денесма мора да објасни зошто се обврзала на пенали од 53 милиони евра за овој месец и вкупно 196 милиони евра за пенали само по основ промена на законот и воведување 60 часа работна недела.

Владата денеска мора да објави кога и кој ден ќе ги исплати 53 милиони евра дополнителни пенали или трошоци, затоа што не го исполни условот, промена на законот за 60 часа работна недела? Владата да го објасни напишаното на страницата 427 од договорот потпишан на 8 март тоа е оваа страница што веќе излезе во медиумите, потенцира Стоилковски на денешната прес-конференција.

Портпаролот на опозициската партија побара да ја покажат соодветната страница од Договорот и дали доколку тоа не е исполнето во рок 45 дена од потпишувањето рокот за завршување на проектот и секоја фаза поединечно ќе биде продолжен за најмалку 6 месеци.

Тој ги спомена и двете точки во кои пишува:

-Дополнителни 1 милион 265 илјади да се плаќаат секој месец до крај на проектот, како Индиректни трошоци, кои инаку се договорени на под 3 милиони; 

-Дополнителни 900.000 евра да плаќаат секој месец додека не се исполни условот, односно не се смени законот за 60 часа работна недела.

Стоилковски појаснува дека 83,5 милиони евра треба да се платат повеќе, за пет години и најмалку шест месеци одложување на проектот.

Со еднократната од 53 милиони сега, цената вкупна расте за 136,5 милиони евра. На тоа ако не се смени законот за 60 часа неделна работа, уште 59.4 милиони евра, значи вкупно најмалку 196 милиони евра дополнително ќе треба да се платат во следните пет години само и само по прифаќањето на еден услов – 60 часа работна недела!, додава тој.

Според него ова е класична злоупотреба на функција и наштетување на буџет.