Американскиот претседател во заминување Доналд Трамп ќе пркоси на традиција и не сака доброволно да ја напушти Белата куќа на денот на инаугурацијата на новоизбраниот претседател Џо Бајден, јави „Си-Ен-Ен“.

Трамп, според дел од медиумите во САД, им порачал на неколкумина негови советници дека на инаугурацијата на Бајден, на 20 јануари, ќе одбие самоволно да ја напушти Белата куќа и ќе мора со сила да замине.

Некои официјални лица се загрижени за таа изјава, но не веруваат дека Трамп ќе го направи тоа.

– Тој ќе ја напушти Белата куќа. Само што сега е налутен, објасни еден советник.

Претходно, „Аксиос“ јави дека Трамп планира да замине од Белата куќа со хеликоптер на 20 јануари, а потоа да лета за Флорида со „Ер форс еден” и да зборува на голем митинг пред неговите приврзаници, каде што ќе го објави своето учество на претседателските избори во 2024 година, со што ќе ги пропушти сите официјални церемонии во главниот град.

Традиционално во САД на денот по црковната служба, идниот претседател и потпретседател пристигнуваат во Белата куќа, се состануваат со своите претходници и пијат чај.