Кинеските научници тврдат дека коронавирусот никогаш нема целосно да го искорениме, на што се согласуваат и се поголем број на светски експерти кои велат дека вирусот ќе се враќа сезонски, како грипот.

Тие наведуваат дека е малку веројатно дека коронавирусот ќе исчезне како што исчезна неговиот „постар брат“ САРС пред 17 години, бидејќи се пренесува меѓу луѓето без да предизвикува симптоми кај сите.

Токму оваа група на асимптоматски пациенти го прави спречувањето на епидемијата многу потешко, објавиле кинеските научници на брифинг во Пекинг.

Кај САРС заразените имале многу тешки симптоми. Кога биле ставани во карантин, болеста престанувала да се шири. Спротивно на тоа, во Кина и понатаму се појавуваат се повеќе асимптоматски случаи на коронавирус, иако епидемијата е ставена под контрола.

Кинеските научници исто така тврдат дека нема докази дека заразата ќе забави за време на летото.

– Вирусот е чувствителен на топло, но дури кога е изложен на температура од 56 степени подолго од 30 минути. Времето нема да стане толку топло. Глобално гледајќи, шансите дека бројот на заразени драстично ќе се намали за време на летото се многу мали, вели Ванг Гуиџианг, шеф на одделението за заразни болести на Универзитетската болница во Пекинг.