Париски суд го прогласи поранешниот француски претседател Никола Саркози за виновен за криминален заговор во судење во кое беше обвинет за примање милиони евра нелегално финансирање од либискиот диктатор Моамер Гадафи за неговата успешна изборна кампања во 2007 година, објави Би-би-си.

Сепак, Саркози беше ослободен од сите други обвиненија, вклучувајќи пасивна корупција и нелегално финансирање на кампања во вредност од десетици милиони.

Саркози, кој отсекогаш ги негираше обвиненијата, е обвинет дека склучил договор со Гадафи во 2005 година, кога тој беше министер за внатрешни работи на Франција, за добивање средства за неговата изборна кампања во замена за поддршка на тогаш изолираната либиска влада на меѓународната сцена.

70-годишникот е на судење од јануари по обвинение за „прикривање проневера на јавни средства, пасивна корупција, нелегално финансирање на изборна кампања и криминален заговор за извршување кривично дело“.

Ова е најголемото судење за корупција со кое се соочил Саркози, откако веќе беше осуден во два одделни случаи: едниот за корупција и злоупотреба на влијание за нелегално добивање поволен третман од судија, а другиот за прикривање на нелегално прекумерно трошење на претседателските избори во 2012 година, на кои беше поразен од кандидатот на социјалистите Франсоа Оланд.

Саркози поднел жалба на двете пресуди.