Министерот за надворешни работи на Сан Марино, Лука Бекари, на 80-тата сесија на Генералното собрание на Обединетите нации во Њујорк објави дека неговата земја ја признава Државата Палестина.

„Официјално ја признаваме Државата Палестина како суверена и независна држава во безбедни и меѓународно признати граници, во согласност со резолуциите на Обединетите нации. Воспоставувањето држава е неотуѓиво право на палестинскиот народ“, изјави Бекари, пренесуваат медиумите.

Тој повика на итен и траен прекин на огнот, ослободување на заложниците и целосен, безбеден и непречен хуманитарен пристап до цивилите погодени од конфликтот.

„Ништо не може да го оправда колективното казнување на палестинскиот народ преку неселективно бомбардирање, гладување и раселување“, нагласи шефот на дипломатијата на Сан Марино.

Бекари предупреди дека континуираното проширување на израелските населби „ја загрозува можноста за мир“ и дека без решителна акција, визијата за два народа кои живеат еден до друг во достоинство и безбедност ќе биде изгубена.