Поднесени се обвиненија против лажен стоматолог и неговите двајца асистенти, кои лекувале десетици пациенти во Чешка откако научиле како да поправаат заби преку интернет, пишува Би-Би-Си.

Чешката полиција наведува дека тројца членови на истото семејство отвориле целосно опремена стоматолошка ординација без никаква лиценца или професионална квалификација во градот Хавличков Брод во централна Чешка во 2023 година.

Лажниот стоматолог, 22-годишник, вршел прегледи, но исто така вадел заби, чистел забни канали и применувал анестезија – сето тоа врз основа на знаење стекнато преку интернет.

50-годишна жена работела како медицинска сестра, додека 44-годишен маж, кој го обезбедил просторот, изработувал протези за пациенти.

„Жената, која претходно работела во здравството, набавувала анестезија, но и други стоматолошки материјали до кои имала пристап, како што се пломби, абразивни прашоци, лепила, материјали за отпечатоци и други“, се вели во соопштението на полицијата.

Полицијата изјави дека нелегалната ординација лекувала десетици пациенти и остварила приход од 4 милиони чешки круни (околу 160.000 евра).

Тројцата беа уапсени претходно овој месец и обвинети за неовластена активност, перење пари, обид за повреда, фалсификување дрога и кражба. Досега не се казнети. Откако се изјаснија за виновни, беа ослободени да се бранат од слобода и се соочуваат со затворска казна до осум години.

Поради хроничниот недостиг на стоматолози, чешкиот Парламент минатата година усвои закон со кој се олеснува вработувањето на стоматолози од земји надвор од Европската Унија.