Отворањето на самостојната изложба „Простор и форма“ од Мице Јанкуловски во „Модерна галерија“ на Центарот за култура „Мија Алексиќ“ во Горњи Милановац, Србија, се одржа на 22 октомври.

Изложбата ја отвори директорот на Центарот за култура, Драган Арсиќ, а кураторот Корнелија Конеска пред присутните го објасни концептот на изложбата.

На изложбата е претставена зависноста помеѓу просторот и формата на многу специфичен начин: со сликарство и графика, со многу големи и многу мали формати, но само со една боја (црната) – а сето тоа во стилот на авторот Мице Јанкуловски.

Јанкуловски е уметник кој твори повеќе од 55 години и во текот на својот професионален развој стана препознатлив по своите атрибути: монохромност – зашто слика само со една боја, црната; модуларност – зашто форматите на неговите дела се секогаш претходно осмислени и во меѓусебна зависност едни од други; мултипликација – зашто формите кои ги користи во своите слики ги мултиплицира, а ги мултиплицира и платната во големи полиптиси; минимализам – зашто својата уметничка цел ја постигнува со минимум елементи, што, всушност, е најтешко да се направи.

Од богатиот опус на неговото творештво, на изложбата се претставени сериите „Круговите на Леонардо“, серија која започна во 2017 година и првото дело од оваа серија беше носител на Наградата за животно дело „Лоренцо ил Мањифико“ на Биеналето во Фиренца во 2019 година.

Идејата за оваа серија Јанкуловски ја црпи од „Студијата за водата“ направена од страна на големиот Леонардо да Винчи, во која тој објаснува дека водата која паѓа од височина создава концентрични кругови кои никогаш не се сечат меѓу себе.

Паралелно со нив се претставени и графичките дела „Формите на Венеција“ и „Формите на Фиренца“ (Омаж на Еугенио Монтале), претставени како триптих на сериграфии со апликација на флок, печатени во студиото за графика „Фалани“ во Венеција. Формите во овие дела Јанкуловски ги сведува на судир меѓу црното и белото. Изложбата ќе биде поставена во „Модерна галерија“ во Горњи Милановац до 6 ноември 2024 година.