Самостојната изложба „41-ва паралела“ на Мице Јанкуловски е поставена во „Хај Арт“ во Ереван
Центарот за современа уметност „Хај Арт“ во Ереван, во соработка со „Култур дијалог армениен“, и „Остен“ – Скопје со поддршка од Делегацијата на Европската Унија во Ерменија, за првпат во регионот го претставува реномираниот македонски и меѓународен уметник Мице Јанкуловски во Ерменија со изложбата со наслов „41-ва паралела“.
Препорачано
Темата на изложбата ги реинтерпретира историските, културните и уметничките сличности и различности меѓу двете земји лоцирани на иста географска паралела. Куратор на изложбата е Корнелија Конеска, а истата во Ереван е поставена од 13 декември 2024 до 13 јануари 2025 година.
Во текот на својот престој од 7 до 11 декември Јанкуловски во Ереван ги создавал платната што се изложени пред ерменската публика, на 10 декември било организирано отворено студио, каде уметници, медиуми и пошироката публика се запознале со процесот на работа.
На 12 декември се одржала и прес-конференција по повод изложбата, на која покрај Јанкуловски и Конеска, говорела Сона Харутјуњан, в.д. директор на Центарот „Хај Арт“, основач и претседател на „Култур дијалог армениен“ и основач на Меѓународното биенале за графика во Ереван.
– Изборот на Јанкуловски и Конеска токму Ерменија да биде првата земја во регионот каде што ја претставува својата уметност го нагласува фактот дека современата уметност во Ерменија се развива во согласност со меѓународните трендови – истакнала Харутјуњан.
На прес-конференцијата присуствувал и Даниел Даниелјан, заменик-министер за образование, наука, култура и спорт на Ерменија.
– Посетата на Мице Јанкуловски има и високо симболично значење, бидејќи нашата политика се движи во насока каде што имаме за цел активно да ја развиваме современата уметност во Ерменија. Оваа изложба го означува и почетокот на соработката со „Остен“ – Скопје, каде што ерменските уметници ќе имаат можност да ја претстават својата уметност надвор од границите на нашата земја. Тие чекаат нови платформи и можности да го покажат својот уметнички потенцијал. Длабоко сум импресиониран, бидејќи имав можност да видам неколку завршени дела од уметникот, кои веднаш пренесуваат енергија и инспирација – истакнал Даниелјан.
(Текстот е објавен во „Културен печат“ број 260, во печатеното издание на весникот „Слободен печат“ на 14-15.12.2024)
