Најновата изложба на фотографии со наслов „Треперење“ на фотографот Боро Рудиќ од 18 ноември е поставена во неговата „Галерија Рудиќ“. Изложбата содржи 22 фотографии во голем формат, создадени во период од 2018 до 2020 година. Со претставените дела авторот се обидува да најде одговор на прашањето што се случува кога ќе се излезе од комфор-зоната на нашата визуелна перцепција.

Покрај фотографиите, на изложбата е презентирано и фотографско портфолио на авторот со ограничено издание од 12 примероци. Секој примерок содржи 16 оригинални фотографии испечатени на сребро халид хартија, нумерирани и потпишани од авторот и сертификат. Станува збор за прво портфолио од овој тип направено во Македонија. Поради ситуацијата со ковид-19, изложбата немаше класично отворање, а наместо тоа ќе може да се посети до 27 ноември, во периодот од 18 до 21 часот.

(Текстот е објавен во „Културен печат“ број 57, во печатеното издание на „Слободен печат“ на 21-22 ноември 2020)