Предлогот на Алијанса за Албанците (АА) за осум изборни единици е скоро ист со досегашниот изборен модел со шест изборни единици, вели за „Слободен печат“ Енвер Салихи, претседател на НВО „Јустиа“ и поранешен член на ДИК, коментирајќи ги предлозите на политичките партии за Изборниот законик.

– Предлогот на Алијанса за Албанците е скоро ист со досегашниот и вреди да се анализира, но сепак, според мое мислење, за постигнувнање на долгорочни цели потребно е да се анализираат сите аспекти на нашето опкружување како општество и како можна опција би било намалување на изборните единици од 6 на 3, со што би се дошло до една средина и опција која би била прифатлива за сите. Три изборни единици е подобра опција и за помалите партии кои би собрале гласови во рамките на две досегашни изборни единици и би имале пратеник додека нивниот предлог за една изборна единица би бил погрешен потег, изјави Салихи.

Според него, ставот на помалите политички партии за една изборна единица сам по себе ќе наметне изборен праг најмалку од 3% на цела територија за добивање на еден пратенички мандат, што е невозможен за 90% од помалите политички партии, но сепак една изборна единица ќе биде идеална за остварување на еднаквоста на гласот (во сите изборни циклуси се гледа дека за првиот пратеник на политичките партии им треба различен број на гласови зависно од ИЕ).

Од друга страна, Венецијанската Комисија во Кодот на добри практики за изборните прашања бара стабилност на изборните закони, како начин за добивање на кредибилен изборен процес кој ќе биде еднаков за сите учесници. Според Кодот, треба да се забрани промена на изборните закони за работи кои се суштински за еден изборен процес, како изборен модел, состав на комисијата како и кроење на граници на една изборна единица, во рок од една година пред одржување на изборите.