Иако добар дел од производителите веќе ги намалија цените на сувомесните производи, министерот за економија соопшти дека тие се наредните производи кои се анализираат.

-Сакам да ги поздравам некои од домашните компании кои уште пред март почнаа да ги намалуваат цените. Цените на месните производи кои се увезуваат ќе биде една од наредните мерки што ќе се анализираат од Министерството за економија – истакна Бектеши.

Владата им излезе во пресрет на барањето на преработувачите на месо и тие беа опфатени со мерката за субвенционирана електрична енергија од 80 евра за мегават час. Овие компании постојано укажуваат дека сточната храна им е поскапена за 70 проценти, а бележат и екстремен раст на транспортните трошоци.

Откако се укина безцаринскиот увоз на месо за преработка, оваа индустрија, со важечките царински давачки, е ставена во нерамноправна положба со странските производители, пред сѐ, оние од соседството, но и од ЕУ. Готовите производи од надвор, влегуваат во земјата со 0 отсто царина, а домашните преработувачи при увоз на суровина, плаќаат царина во висина од 20 до 35 отсто.