Американскиот секретар за одбрана Пит Хегсет ги објави плановите за намалување на програмата за градење и испраќање ново оружје во Украина. За време на конгресното сослушување за воениот буџет, Хегсет го информираше Претставничкиот дом за плановите за кратење на буџетот, но не даде никакви детали за финансирањето за 2026 година. САД и дадоа речиси 67 милијарди долари на Украина откако Русија ја започна својата целосна инвазија во февруари 2022 година, известува „Форсес њуз“.

Оваа администрација има многу поинаков став за тој конфликт. Ние веруваме дека мирното решение преку преговори е во најдобар интерес на двете страни и во интерес на нашата нација, особено со оглед на сите конкурентски интереси ширум светот – истакна Хегсет.

Пренасочување на муницијата од Украина на Блискиот Исток

Ваквиот став доаѓа неколку дена откако украинскиот претседател Володимир Зеленски изјави дека САД пренасочиле 20.000 проектили против беспилотни летала кои требаше да им бидат дадени на вооружените сили на Украина во договорот постигнат под администрацијата на Бајден.

Муницијата беше испратена до американските вооружени сили стационирани на Блискиот Исток. Зеленски рече дека ракетите се клучни за спротивставување на нападите со руски беспилотни летала, вклучително и роеви дронови Шахед, дизајнирани од Иран. Во интервју за Еј-би-си Њуз, тој рече:

„Имаме големи проблеми со Шахедите… ќе ги најдеме сите алатки за да ги уништиме.Сметавме на овој проект од 20.000 американски ракети кој можат да ги рушат дроновите Шахед. Не беше скапо, но е посебна технологија – изјави Зеленски.

Хегсет: Да разјасниме што значи победа

За време на сослушувањето, демократската конгресменка Марси Каптур, копретседател на Конгресната украинска група, го повика секретарот за одбрана да продолжи да ги поддржува воените напори на Украина и да не ѝ го врти грбот на земјата.

Таа рече: „Украина е во војна повеќе од една деценија. Она што тие го направија со беспилотните летала е зачудувачки и ќе го промени војувањето. Помогнете да победи слободата. Ова е најважниот тест на слободата за нашата НАТО алијанса во мојот живот. И подобро ќе ни помогне да победиме.

Но, Хегсет на тоа одговори дека тој е посветен на запирање на убиствата.

„Ние учиме од Украина секој ден. Но, мислам дека треба да разјасниме што значи победата. Овој претседател е посветен на мирот, тој е посветен на запирање на убиствата, а тој не беше на функцијата кога започна во 2014 година. Немаше дополнителни упади во неговиот прв мандат, а потоа, под претходната администрација, Владимир Путин се обиде да ја покори Украина. Оваа администрација е посветена на Украина и на мирот – додаде тој.