Рускиот амбасадор во ОН Василиј Небензја денеска на седница на Советот за безбедност ги повтори тврдењата на Русија за „нацистите“ во Украина.

„Тие ни велат дека не може да има нацисти во Украина. За жал, тие се на власт таму“, рече Небензја.

Дипломатскиот дописник на Би-Би-Си, Пол Адамс, наведува дека наративот на Кремљ, според кој цела Украина е под нацистичка контрола, се повторува речиси во секоја изјава на руските официјални лица.

-Се разбира, Украина има свои екстремно десничарски елементи, јави дописникот. Некои од нив ги идолизираат украинските политичари кои се бореле заедно со нацистите против Русија во Втората светска војна. Но, екстремната десница е маргинална во Украина, исто како и на друго место во Европа, рече Адамс.

Морничава последна забелешка на рускиот амбасадор

Искрената дипломатска проценка на настаните во Украина од 2014 година ќе открие земја која се бори да стане подемократска и помалку корумпирана. Пред се, земја која се обидува да тргне по патот на својата независност, далеку од несаканото влијание на Москва, наведува дописникот на Би-Би-Си, додавајќи дека последните забелешки на рускиот амбасадор во ОН се ужасни.

„Не дојдовме во Украина за да освојуваме територии. Мораме да го отсечеме малигниот нацистички тумор кој ја јаде Украина и кој на крајот ќе почне да ја јаде и Русија. И ќе ја постигнеме таа цел“, рече рускиот амбасадор.