46-годишниот Павел Избрехт, извршен директор на фабрика за цинк и претставник во регионалното законодавно собрание на регионот Чељабинск, загина денеска недалеку од стрелиште во градот Чељабинск.

Прелиминарно, причина за смртта е невнимателно ракување со оружјето. Избрехт дошол на стрелиште за да испроба нов пиштол, пишува Ura.ru.

Локалниот портал „74.ru“ наведува дека Избрехт требало да замине, но решил да провери дали пиштолот е празен. Тогаш одекнал истрелот што го убил. Каналот на „Телеграм“, „База“ ја објави истата верзија на приказната. Луѓето кои го познавале Избрехт тврдат дека тој бил страстен ловџија и сакал екстремни спортови.

Вработените во истражниот комитет на Чељабинск, истражители и форензичари, пристигнаа на местото на настанот. Заменик-шефот на Истражниот комитет на Руската Федерација за регионот, Алексеј Шавкунов, е одговорен за координација на истрагата. Регионалната влада изрази сочувство за смртта на Избрехт.

„Павел Александрович Избрехт беше еден од најпочитуваните претставници на индустриската заедница, вистински патриот на Русија и на Урал. Неговата ненадејна смрт е голема загуба за регионот Чељабинск и за целата земја. Светлиот спомен на овој прекрасен човек и талентиран лидер засекогаш ќе остане во срцата на неговото семејство, другарите и пријателите, сите што го знаеја и го ценеа“, се вели во соопштението за печатот.

Од 2014 година Избрехт е извршен директор на фабриката за цинк во Чељабинск. Во 2021 година, тој беше избран за претставник во регионалниот парламент. Тој немал намера да се кандидира на претстојните избори.