Вечерва е пронајдена четврта жртва од поплавите во одморалиштето Елените, изјави директорот на Регионалната полициска дирекција во Бургас, Владимир Маринов.

-Добивме пријава од руски државјанин кој ни соопшти дека денеска пристигнал од Русија бидејќи немал никаков контакт со сопругата. Семејството има вила во Елените, во крајниот дел од загрозената зона, каде што количеството вода била најголема – рече виш комесар Маринов.

Мажот дошол на местото на настанот и покажал каде е нивниот дом. Групата што го вршела чистењето го открила телото на неговата сопруга, 58-годишна жена, додаде виш комесар Маринов.

Телото било закопано во кал и остатоци од дрвја однесени од силниот бран вода.

– Телото сè уште треба да се прегледа, ќе се спроведат процедурални и истражни дејствија. Пријавата е веднаш обработена. Ова е четвртата жртва. Ќе биде нареден форензички преглед за да се утврдат причините за смртта – рече и директорот на полицијата во Бургас.

Претходно, градоначалникот на Свети Влас, Иван Николов, за БТА изјави дека градското собрание добило сигнал за откриено тело на жена во одморалиштето Елените.

БТА потсетува дека комплицираната метеоролошка ситуација со поројните дождови во Бургаскиот регион одзеде три жртви и предизвика материјална и инфраструктурна штета.

Во општините Бургас, Царево и Несебар е прогласена вонредна состојба.