Тројца водечки руски експерти што ја развивале технологијата на хиперсонични проектили се соочени со „многу сериозни обвинувања“, објави Кремљ.

Отворена е истрага за велепредавство против Анатолиј Маслов, Александер Шипљук и Валериј Звегинцев од Институтот за теоретска и применета механика во Новосибирск, поради непрецизирани сомневања. Согласно новите руски закони, обвинение за велепредавство се казнува и со 20 години затвор.

Маслов бил уапсен во јули и најверојатно е обвинет за трансфер на витални информации за хиперсонична технологијата на Кина. Шипљук беше уапсен во август, а воопшто не се знаеше дека бил приведен и Звегинцев, наводно поради статија за динамика на гасови објавена за ирански стручен журнал.

Професори, научници и инженери од Институтот во понеделникот со отворено писмо застанаа во одбрана на своите колеги, тврдејќи дека тие не се виновни и дека нивното гонење може да предизвика огромна штета за руската наука воопшто.

-Го знаеме секој од нив како патриот, како чесен човек што не е во можност да го стори она за кое се осомничени – наведуваат научниците во писмото.

Портпаролот на Кремљ, Дмитриј Песков, изјави дека го прочитал писмото, но и дека не може да го коментира случајот, бидејќи го водат службите за безбедност.

Случајот ја разбранува јавноста откако украинската противвоздушна одбрана објави дека ги соборила сите руски хиперсонични проектили „кинжал“ лансирани кон Киев.

Претседателот Владимир Путин пред пет години ги промовираше новите хиперсонични балистички проектили, за кои гордо објави дека ниту еден противвоздушен систем во светот не може да ги запре да ја уништат својата цел.