Руската влада започна со намалување на финансиските стимулации за доброволците кои се приклучуваат на армијата, јавуваат руски и меѓународни извори. Промените се дел од поширока ревизија на трошоците поврзани со ангажманот на нови борци, во услови кога воените операции во Украина и натаму бараат значителни ресурси.

Во изминатите две години, Москва нудеше значајни бонуси и плати како поттик за регрутација, вклучително и еднократни исплати што на места надминуваа 300.000 рубли. Но, според новите информации, овие износи се намалуваат – особено во регионите каде интересот за приклучување на армијата останал стабилен, јавува РСЕ.

Овој потег доаѓа во период кога Кремљ се соочува со економски предизвици, санкции и зголемени буџетски оптоварувања. Аналитичарите предупредуваат дека намалувањето на стимулите би можело да влијае врз мотивацијата и квалитетот на новите регрути, особено во сиромашните и периферни региони.