Висок претставник на руските власти изјави дека големиот број ранети војници во Украина ја направил Русија „светски лидер во производството на протези за раце и нозе“, пишува „Гардијан“.

Заменичката-министерка за одбрана Ана Цивиљова, за која се тврди дека е роднина на Владимир Путин, на конференција во Владивосток рече дека војниците кои се враќаат од фронтот станале „движечка сила“ за развој на руските иновации во областа на протезите за екстремитети.

„Веројатно сега сме лидери во оваа насока“, изјави таа на Источниот економски форум во Владивосток.

Цивиљова додаде дека „токму учесниците во специјалната воена операција“ ѝ овозможиле на Русија да достигне „водечко и приоритетно ниво“.

Путин минатата година рече дека околу 700.000 руски војници се борат во Украина. Москва, меѓутоа, го крие бројот на убиени и ранети и ретко објавува податоци за загубите.

Британското Министерство за одбрана проценува дека од почетокот на целосната инвазија на 24 февруари 2022 година се убиени или ранети повеќе од милион руски војници.

Оваа бројка се совпаѓа со студија на американскиот Центар за стратешки и меѓународни студии (CSIS), според која до 250.000 руски војници се загинати, а вкупните жртви, вклучувајќи ги ранетите, надминуваат 950.000.

Зголемениот број жртви се гледа и во други сектори. Погребалната индустрија во Русија бележи раст – меѓу јануари и април 2025 година приходите се зголемиле за 12,7% во однос на истиот период лани. Истовремено, се зголемува и бројот на ветерани кои се враќаат дома без раце или нозе.

Според официјални податоци, во 2024 година во Русија биле издадени 60.000 протези повеќе отколку во 2021 година – што е пораст од 65%.

Цивиљова е под санкции од САД, Европската Унија и Британија поради нејзината улога во руската офанзива врз Украина. Таа е ќерка на братучед од прво колено на Путин; Лондон ја опишува како „братучетка на Путин од второ колено“, а ЕУ ја наведува како „блиска роднина“ на лидерот на Кремљ.