Поради големиот интерес од страна на туристите за селото Радожда и неговите убавини, во 1970-тите биле изградени две туристички одморалишта – „Треска“ и „Ливадишта“ кои располагале со камп-приколки, бунгалови, ресторани и хотелски соби.

„Слободен печат“ беше да го посети одморалиштето „Треска“ кое некогаш било популарно меѓу туристите. Од она што нашата камера успеа да го сними, може да се види дека се останати само руини кои покажуваат дека во минатото тука имало еден прекрасен комплекс, кој служел за одмор на вработените од истоимената позната скопска фабрика за мебел.

Ова познато летувалиште на струшката ривиера е оставено на милост и немилост на времето, откако во 2005 година оваа фабрика прогласи стечај. Истиот го побарала Управата за јавни приходи за да си ги наплати даноците. Грчките газди „Планет ворлд“ откако влегле во фабриката не ги плаќале даноците и придонесите.

На 19.04.2019 година беше закажана постапката за продажба на имотот на компанијата преку стечајниот управник Радослав Ќипровски од Скопје, но Основниот суд Скопје 2 одлучи ден претходно да ја сопре постапката за продажба. Не е познато дали и ова одморалиште било дел од оваа постапка.

Жителите на Радожда коментираат дека руинираниот камп е рак-рана на ова туристичко место кое во последно време е се поатрактивно, како за домашните, така и за странските туристи. Останува на времето да покаже кога овој комплекс ќе добие нов сопственик кој ќе го врати стариот сјај на одморалиштето.

Во меѓувреме, погледнете што остана од летувалиштето „Треска“.