Руди Гарсија: Одиме да победиме на сите наши мечеви во квалификациите за СП 2026
Белгија е следниот противник на најдобрата македонска фудбалска репрезентација во квалификациите за пласман на Светското првенство во 2026 година.
Препорачано
Дуелот помеѓу Македонија и Белгија ќе се игра в петок со почеток од 20.45 часот на Националната арена „Тодор Проески“ во Скопје.
Ова ќе биде прв меч за Белгијците во квалификациската група Ј, а трет за избраниците на селекторот Благоја Милевски.
Селекторот на Белгија, Французинот Руди Гарсија кој дојде на клупата како наследник на Доменико Тедеско во јануари ги сподели амбициите пред стартот на мундијалските квалификации. Белгија нема пораз во квалификации за СП скоро 16 години.
Белгија годинава успеа да обезбеди опстанок во „А“ сегментот во Лигата на нации. Иако беше поразена во првиот меч против Украина (3:1), во реваншот во Генк ја анулираше негативата и славеше со 3:0.
– Не е чувство на олеснување, туку на задоволство – рече Гарсија на прес-конференцијата по натпреварот. – Очекував да видам реакција полна со гордост, и тоа е она што го почувствував таму. Се надевам дека ќе можеме да се потсетиме на овој натпревар како натпревар што ги постави темелите и дека ќе успееме да се квалификуваме за Светското првенство без да мора да поминуваме низ плеј-офот. Следни се квалификациите за Светското првенство и очигледно ќе се стремиме да ги добиеме сите наши натпревари – се зборовите на Гарсија на официјалниот сајт на ФИФА.
