Американскиот државен секретар Марко Рубио изјави дека Ватикан би можел да биде место за мировни преговори меѓу Русија и Украина. Зборувајќи со новинарите во Рим пред средбата со кардиналот Матео Купи, кој е папски пратеник задолжен за мировната мисија во Украина, Рубио синоќа изјави дека ќе разговара за потенцијалните начини на кои Ватикан би можел да помогне во преговорите.

На прашањето дали Ватикан може да биде посредник за мир, Рубио одговори: „Не би го нарекол посредник, но секако мислам дека тоа е место каде што двете страни би се чувствувале удобно“, пренесува АП.

Тој исто така рече дека Соединетите Американски Држави се благодарни на Ватикан за неговата подготвеност да ја игра „оваа конструктивна и позитивна улога“.

Ватикан има традиција на дипломатска неутралност и редовно ги нуди своите услуги и средства за преговори, според АП.