Тренерот на португалскиот фудбалски клуб Спортинг Лисабон, Рубен Аморим ќе седне на клупата на Манчестер јунајтед, објави денеска Скај. Се очекува Аморим денеска да потпише договор на две и пол години, со опција за продолжување на дополнителни 12 месеци.

Манчестер јунајтед му плати дополнителен милион евра на Спортинг, со излезна клаузула вредна 10 милиони евра, за да му дозволи на португалскиот клуб да го ослободи Аморим порано од очекуваното.

Вршителот на должноста менаџер на Манчестер јунајтед, Руд ван Нистелрој изјави за Скај дека е „среќен што помага онолку долго колку што е потребно“ и дека сака да остане да соработува со Аморим, кој на Олд Трафорд ќе донесе неколку членови на стручниот штаб на Спортинг.

Извршниот директор на Манчестер Јунајтед, Омар Берада и спортскиот директор Дин Ешворт ги финализираа разговорите во Лисабон, а членовите на Манчестер Јунајтед кои преговараа со Спортинг се вратија во Англија во средата.

Аморим (39) дојде во Спортинг во 2020 година и оттогаш освои две титули во португалската лига и двапати го освои Купот на Португалија. Манчестер јунајтед е на 14. место на табелата во Премиер лигата со 11 бодови, а во следното коло в недела ќе го пречека Челси.