Роуан Аткинсон, актерот познат по улогата на Мистер Бин е обвинет за „оштетување“ на угледот на електричните возила, што придонесе за нивната слаба продажба. Името на актерот беше споменато во британскиот Дом на лордовите за време на состанокот на Комитетот за животна средина и климатски промени.

Невладината организација Зелена алијанса ги изложи своите ставови за главните пречки со кои се соочува владата во обидот за постепено укинување на автомобилите со бензин и дизел пред 2035 година. Тие рекоа дека коментарите на Аткинсон се штетни за каузата, пренесува Скај њуз.

„Еден од најштетните написи беше коментарот на Роуан Аткинсон во Гардијан кој беше целосно демантиран. За жал, проверките на фактите никогаш не допираат до истата широка публика како првобитното лажно тврдење, што ја потврдува потребата да се обезбедат високи уредувачки стандарди“, забележаа тие.

Написот на 69-годишниот актер беше насловен: „Сакам електрични возила – и на почетокот ги прифатив. Но, се чувствувам се повеќе и повеќе измамено“. Аткинсон напиша дека електричните возила се „малку бездушни“ и ја критикуваше употребата на нивните литиум-јонски батерии.

Како алтернативни решенија, тој предложи возачите да го чуваат истиот автомобил што е можно подолго и да ја зголемат употребата на синтетички горива што ќе ја негира потребата од електрични возила. „Сè повеќе чувствувам дека нашиот меден месец со електрични автомобили се ближи кон крајот и тоа не е лошо“, напиша тој.

Актерот, кој себеси се нарекува ентузијаст за автомобили, е дипломиран електроинженер. Тој призна дека ги советувал пријателите уште да не купуваат електрични возила, освен ако немаат стар дизел.