Наместо гламурозна фудбалска вечер со бразилски шмек, гостувањето на славниот Роналдињо во Полска заврши со разочараност кај организаторите, кои очекувале многу повеќе од некогашниот ас на Барселона и Милан.

Настанот наречен „Роналдињо шоу“ не ги исполни очекувањата, особено поради, како што пренесуваат полските медиуми, незаинтересираноста и арогантниот однос на бразилската фудбалска легенда.

Роналдињо прво доцнел цели два часа на заедничкиот ручек што бил организиран како вовед во официјалната програма. Потоа одбил било каква комуникација со медиумите, и покрај тоа што токму медиумскиот интерес бил клучен дел од промоцијата на настанот.

Дополнително, инсистирал на посебен превоз до стадионот, не сакајќи да се вози со другите учесници. Кога започнал хуманитарниот натпревар, Роналдињо одиграл 73 минути, по што веднаш го напуштил стадионот без да комуницира со присутните.

Неколку часа по натпреварот, преку објава на социјалните мрежи се заблагодарил на присутните, но според организаторите и дел од јавноста, тоа било премалку во однос на очекувањата и ангажманот што бил планиран за неговото присуство.