Романија, во екот на модернизацијата на својата одбрана, денес објави дека постигнала седумгодишен договор со Израел за набавка на воени противвоздушни системи, во вредност од повеќе од две милијарди евра, пренесува Н1 телевизија.

„Министерството за одбрана и израелската компанија Рафаел потпишаа рамковен договор за набавка на шест системи со краток дострел. Програмата има за цел да ја опреми војската со системи за оружје дизајнирани да штитат од воздушни закани, вклучувајќи беспилотни летала и крстосувачки ракети“, се вели во соопштението за медиумите од владата на Романија, која е членка на НАТО.

Романскиот министер за одбрана Јонут Мостеану неодамна ги спореди овие одбранбени батерии на јавната телевизија со „Железната купола“, која се користи за „заштита на Тел Авив од ирански напади“.

Романија, која дели граница од 650 километри со својот украински сосед и се граничи со Црното Море, веќе неколку години го модернизира својот одбранбен систем, постепено заменувајќи ги авионите и оружјето од советско производство.

Во 2024 година, Букурешт потпиша договор за купување на 32 борбени авиони Ф-35 од САД за 6,5 милијарди евра, а таа набавка беше опишана како „историска“.

Сега во постојана готовност, Романија редовно ги осудува нарушувањата на својот воздушен простор од страна на руски беспилотни летала и постојано открива остатоци од беспилотни летала на своја територија.