Меѓуопштинскиот центар за социјална работа Прилеп, во врска со немилиот настан за смртта на двете новороденчиња кои починаа вчера на возраст од само 20 дена, направил увид во домот на родителите во селото Славеј. Одлучено е во наредниот период Центарот да врши родителски надзор бидејќи семејството има уште 3 деца, на што родителите се согласиле. Дедото на бебињата пак, во изјава за јавниот сервис МТВ, рече дека „едното бебе починало од бронхитис, а другото поради грешка на лекарите“. Од болницата го негираат ова.

Врз основа на увидот констатирано е дека во семејството има уште три малолетни деца, условите каде што живее семејството не се екстремно лоши и нехумани, како што се прикажува во јавноста, туку напротив, родителите имаат обезбедено, греење во домот, храна и облека за децата, единствено што недостасува поголемо внимание и запазување на хигиената. Од евиденцијата на Центарот, семејството е корисник на родителски додаток за трето дете и гарантиран детски додаток а повремено, таткото работи како аргат во селото, има дополнителна помош од дедото кој е во редовен работен однос и им помага, велат од ЦСР Прилеп.

Претходно пак, директорот на прилепската болницата доктор  Кире Јоноски за „Слободен печат“ рече дека дека кај едното близначе била констатирана смрт откако било донесено со возило на итната помош, а другото и покрај реанимацијата не успеало да се спаси.

-Вчера брзата помош отишла на лице место во селото Славеј. Двете новороденчиња беа неухранети, премрзнати, јас бев присутен кога анестезиологот и педијатарот ја вршеа реанимацијата. Едното дете имаше минимални знаци на живот но реанимацијата беше неуспешна, а кај другото беше веднаш констатирана смрт, рече за „Слободен печат“ доктор Јоноски.

Центарот за социјални работи извршил нов увид во домот на семејството денеска и констатирале добри услови за живот.

Во текот на денешниот ден е извршиен нов увид во домот на семејството. Во моментот на увидот децата се згрижени од страна на дедото и е констатирано дека хигиената е подобрена отколку на првиот увид. Во текот на денешниот ден, направен е разговор со родителите, кои се спремни за соработка. Од извршениот разговор добиени се сознанија дека новорденчината се родени со мала родилна тежина, биле задржани десет дена на болничко лекување, а потоа мајката со новороденчињата е предвреме пуштена во домашни услови. При увидот во домот е констатирано дека има бебешка храна, две шишиња за млеко, средства за хигиена, памперси, количка за близнаци. До немилиот настан до ЈУ МЦСР Прилеп нема никаква пријава или дојава од страна на член на семејството или од страна на друго лице од пошироката средина, ниту од институција, дека семејството или било кој член на семејството се во состојба на ризик, пишуваат од ЦСР Прилеп.

Како што наведоа од прилепската болница на 30.12.2024 година, мајката родена во 2001 година, во својата четврта бременост (близначка), се породила спонтано. Близначињата се недоносени, родени во 34-та гестациска недела. Првото новороденче, машко, е со родилна тежина од 1970 грама, а второто, женско, со тежина од 1780 грама.

На 10.01.2025 година, по барање на мајката и со нејзин потпис, новороденчињата се испишани од болницата. На 16.01.2025 година, во 10:45 часот, на одделот за детски болести е донесено женското новороденче во тешка здравствена состојба како резултат на премрзнување. Според достапните информации, машкото новороденче е претходно починато дома од истата причина, се наведува во соопштението од болницата.

Оттаму додаваат дека по приемот на женското новороденче, веднаш е преземена интензивна медицинска интервенција.

Извршена е реанимација, новороденчето е интубирано, поставено во топли ќебина и применети се дополнителни мерки за затоплување. И покрај сите преземени обиди од страна на медицинскиот персонал, состојбата продолжи да се влошува. Во 13 часот, за жал, е констатирана смртта на женското новороденче. Изразуваме длабоко жалење за загубата и остануваме посветени на обезбедување најдобра можна грижа за сите пациенти, велат оттаму.

Јавен обвинител од ОЈО Прилеп издаде наредба за обдукција на починатите новороденчиња со цел да се утврдат причините за смртта.

-Близначињата биле во тешка здравствена состојба, па мајката повикала итна помош која штом пристигнала во домот во селото Славеј констатирала смрт кај едното бебе. Другото било префрлено во прилепската болница во тешка состојба каде починало, изјави за „Слободен печат“ јавниот обвинител Стевчо Биноски.

Јавниот обвинител го извести Центарот за социјални работи од Прилеп кој врши засилен надзор во семејството и треба да заклучи во однос на евентуални заштитни мерки за останатите три деца, додаваат од обвинителството.