Во предвечерјето на 1 Мај – Ден на трудот и 34-тиот роденден на „Канал 103“, екипата на култното музичко радио ги поканува своите знајни и нејзнајни радио-пријатели и поддржувачи на дружење во интимните прегратки на Старата скопска чаршија, каде ќе се одржи концертот на финскиот музички алхемичар Кадонут Манер. Концертот ќе се одржи на 30 април, од 20 часот, во „Ла Кања“.

Кадонут Манер е проект на Лаури Манер, уметничко име кое може да се преведе како „изгубениот континент“. Неговата музика е емотивно патување кое го спојува американскиот гитарски примитивизам со длабочината на блузот и суровата убавина на северот – наследство преточено во нешто сосема ново и лично.

Зад себе има богата 20-годишна музичка кариера како басист во повеќе панк бендови во матичната Финска („Out of Tune“, „Death by Snoo Snoo“, „Viimeinen Maailmansota“) и повеќе од 400 настапи ширум Европа, гостувања на повеќе значајни панк, фолк и џез-фестивали, како и седум самостојни турнеи.

Вечерта по неговиот концертен настан музички ќе ја заокружат селекторите на „Стотројка“.

Претходната вечер (29 април) Кадонут Манер настапи во студиото на „Канал 103“, во рамки на радио-серијалот „Ако никој не свири“.

– Со оваа прослава на нашиот нов соларен круг започнува концертниот серијал „Нова пролет“, каде нè очекуваат настапи на повеќе странски и домашни бендови и музичари. До јуни ќе го исполниме нашиот град со нови звуци, идеи и средби. За следното музичко другарување, наскоро со повеќе информации. Борбата продолжува – посочуваат од „Канал 103“.