Најдобриот светски тенисер Новак Ѓоковиќ полека ја подобрува формата на својот „омилен грен слем“ и е апсолутен фаворит за 11 титула на „Австралија опен“.

Сите тениски стручњаци се согласни во едно – без разлика дали има проблем со повреда или не, Србинот секогаш е главен претендент за „тронот“ во Мелбурн. Легендарниот Род Лејвер верува дека само чудо може да го спречи Ѓоковиќ.

– Новак знае сè на теренот. Го има секој адут во ракавот и точно знае кога треба да ги користи, а кога не – изјави сопственикот на 11 Грен слем титули и човекот по кој е именуван централниот терен.

Австралиецот вели дека понекогаш му се чини дека Ѓоковиќ едноставно се „шегува“ на терените:

– Понекогаш ми се чини дека се предизвикува себеси на патот до финалето. Понекогаш губи сет на грен слем турнири, а јас помислувам како тој се шегува со нас, затоа што може лесно да победи со два загубени гема по сет. Добро сервира, непобедлив е во играта од основната линија, па мислам дека доколку не се случи чудо, некој да го одигра најдобриот меч во неговиот живот и да го елиминира, може комотно да почне да му го гравира името на пехарот – рече Лејвер.

Да потсетиме, следен ривал на српскиот тенисер е Адријан Манарино од Франција, а овој меч од осминафиналето е закажан за ноќта меѓу сабота и недела.