Ракометниот клуб Тинекс Пролет објавува дека спогодбено е прекината соработката со досегашниот шеф на стручниот штаб, Алексо Лембанов, прифаќајќи ја неговата оставка поднесена по поразот од Вардар Неготино пред две седмици.

Овој стручњак помина неколку години во Тинекс Пролет, најпрвин работејќи со младите категории како помошник во стручниот штаб, а во последните две години беше и прв тренер на клубот.

– Изразуваме благодарност до Лембанов за професионалниот ангажман во целиот период во кој беше дел од Тинекс Пролет и му посакуваме многу среќа во иднина – пренесува РК Тинекс Пролет.

Функцијата ВД-тренер ќе ја извршува Илија Темелковски, под чие водство екипата успеа да слави во Прилеп.

Клубот во меѓувреме ќе биде во интензивна потрага по долгорочно решение за функцијата шеф на стручниот штаб.