Ракометарите на Алкалоид ја запишаа втората победа на гостински терен на дерби натпреварот со амбициозниот ГРК Охрид. Тимот на Кирил Лазаров триумфираше со осум голови разлика (36:28) и ги задржа шансите за повисок пласман на плеј-оф табелата во македонската Суперлига.

Стартните минути му припаднаа на РК Алкалоид, но домашниот состав израмни, а потоа и диктираше игра сѐ до резултат 7:7. Одново Алкалоид го презема водството и до крајот на полувремето беше во позитива. Во финишот на првото полувреме, играчите на Лазаров успеаја да поведат и со два голови разлика (11:9, 12:10) и ја задржаа предноста до крајот на првиот дел што заврши со резултат 16:14.

Добро отворање на второто полувреме имаше гостинот и со два голови по ред стигна до највисоките до тој момент „плус четири“ (18:14). Домашниот состав одговори со серија од 4:0 и израмнување на 18:18, по што повторно натпреварот влезе во ритам гол за гол. Но, Алкалоид веќе ја имаше победничката формула, беше доволно трпелив и ги искористи своите шанси и на 10 минути до крајот на мечот имаше 28:24. Завршницата на овој натпревар беше комплетно во знакот на Алкалоид чија предност полека растеше и стигна до конечните 36:28.

Ѓоргиев со шест, Серафимов со пет и Франциско со четири погодоци беа најефикасните играчи во Алкалоид, а за ГРК Охрид Орјоникидѕе имаше шест голови, а по четири Сафранко, Јотиќ и Цирар.

Следниот предизвик на РК Алкалоид е европски. Во недела во Скопје, со почеток од 19.00 часот во полуфиналето на ЕХФ Европскиот Куп ќе го игра првиот дуел од двомечот со норвешкиот Рунар Сандефјорд.