Костадин Петров многу бргу ги освои симпатиите на навивачите на ракометниот клуб Алкалоид со својата борбеност, со залагањето и со позитивната енергија што ја внесува во суперлигашката екипа.

За пивотот оваа натпреварувачка сезона е завршена поради посериозна повреда на коленото.

– Поради посериозна повреда на коленото тој нема да може да му помогне на клубот до крајот на сезоната на важните натпревари од Суперлигата и од Купот на Македонија. Од клубот му посакуваме брзо заздравување и што поскоро враќање на теренот – информираат од РК Алкалоид.

Поради споменатата повреда, Петров нема да биде и дел од најдобрата македонска репрезентација за претстојните два натпревари од квалификациите за ЕП 2024 против Луксембург и Турција.

Потсетување дека екипата предводена од Кирил Лазаров по победата над ГРК Охрид во домашниот шампионат обезбеди настап во ЕХФ Европската лига следната сезона.