Бразилската фудбалска легенда Ривалдо тврди дека Лионел Меси ќе го продолжи договорот со Барселона иако пред почетокот на сезоната сакаше да си замине од „Камп Ноу“.

Аргентинецот минатото лето побара да му биде овозможено да си замине од Барселона без обесштетување, но тогашниот претседател Хосеп Марија Бартомеу не му го дозволи тоа, со што на Меси му остана да ја одиграа оваа сезона во каталонскиот клуб.
Но, годинава се случија доста работи во клубот, на претседателската функција се врати Жоан Лапорта кој веднаш најави дека главна цел му е да го наговори Меси да остане во Барселона, а клубот игра фантастично во последно време. Роналд Куман конечно го склопи моизаикот и Барселона во последните 13 кола во Ла Лига има 12 победи и само едно реми и заостанува само четири бода зад лидерот на табелата, Атлетико Мадрид.
– Барселона неверојатно се крена од доаѓањето на новиот претседател, а Меси повторно игра фантастично и изгледа многу посреќен на теренот од доаѓањето на Лапорта. Од тие причини верувам дека Меси ќе се договори со новата управа и ќе потпише нов договор со кој ќе остане долго во Барселона – изјави поранешниот фудбалер на каталонскиот тим.