Членката на Државната комисија за спречување на корупцијата (ДКСК), Цвета Ристовска, која вчера реферираше во врска со случајот со дипломата на директорот на БНБ Бојан Христовски од Универзитетот за туризам и менаџмент и соопшти дека случајот е чист, е ангажирана како предавач на истиот универзитет, објави „Телма“.

И на сајтот на Антикорупциската комисија и на оној на универзитетот, во нејзините биографии пишува дека Ристовска е ангажирана како наставен кадар. Во април, таа добила и роденденска честитка на инстаграм-страницата на универзитетот, како колешка, објави „Телма“.

Ова отвора прашања за судир на интереси, бидејќи токму на Ристовска во ДКСК ѝ бил доделен предметот за Христовски, од кој дел се однесува на сомнителна диплома од истиот универзитет на кој антикорупционерката предава. Со анонимната претставка до Антикорупциска беше оспорена факултетската диплома од Универзитетот Скопје на директорот Христовски, која тој ја пријавил за да ги исполни условите за функцијата. Иако е дел од наставниот кадар на истиот приватен универзитет, Ристовска не се откажала од предметот за директорот на Агенцијата. Таа вчера уверуваше дека Просветниот инспекторат не нашол ништо спорно во факултетската диплома издадена од универзитетот каде, според достапните информации, Ристовска е дел од наставниот кадар.

Во Етичкиот кодекс на Антикорупциската комисија е наведено дека членот треба да се откаже од одлучување во предмети кои се поврзани со судир на интереси.

„Претседателот и членот на Комисијата нема да дозволат финансиски интерес или каква било друга форма на интерес утврдена со закон, за него, за неговото семејство, за роднините, пријателите, за физички и правни лица со кои има или претходно имал деловни врски, да дојде во судир со нејзината/неговата функција“, пишува во членот 9, став 1 од Етичкиот кодекс на ДКСК.

ДКСК доцна попладнето испрати демант до „Телма“ во кој се вели дека „членот на ДКСК нема било каква деловна врска со Универзитетот Скопје, како би дошло до судир на интереси во нејзиното постапување во конкретниот предмет, од причина што Универзитетот Скопје не е предмет на постапување пред ДКСК“, како и дека надзорот не го извршила ДКСК, туку Просветниот инспекторат:

ДКСК во реакцијата не објаснува зошто во официјалната професионална биографија на Ристовска, објавена на веб-страницата на Антикорупциската комисија, е наведено дека таа е ангажирана на „спроведување настава од наставен предмет – ревизија, Универзитет за туризам и менаџмент, Скопје, 2012-тековно“ и како тоа се совпаѓа со тврдењето дека Ристовска „нема било каква деловна врска со Универзитетот Скопје“.

Во исто време, на веб-страницата на Универзитетот Скопје до вечерва беше наведено дека магистер Цвета Ристовска е асистент-предавач и членка на Советот на универзитетот, а нејзиното име и фотографија беа во делот на сајтот каде е претставен наставниот кадар. Откако „Телма“ ја објави веста и другите медиуми ја пренесоа, а ДКСК го испрати демантот, името на Ристовска и нејзината фотографија беа отстранети од сајтот на универзитетот.

Како директорот на АНБ Бојан Христовски, добил диплома за факултет со 7 суштествени повреди, прашува Апасиев