Режан тутун, цигари, спортска облека, авто делови, храна за животни,  рачни часовници, козметички производи, авто галантерија… заплениле цариниците во текот на минатата недела.

Како што информираат од Царинската управа,  режан тутун во вкупна количина од 109,5 килограми бил запленет од страна на мобилен тим во координација со СВР Битола при МВР.

„Режаниот тутун е одземен од албански државјанин со регулиран престој во Битола, во моментот кога требало да ги преземе кесите со тутун од возачот на автобус на превозна фирма од Битола. Лицето не поседувало документи за потекло и платени акцизни давачки. Со ова е спречен обид за пуштање во промет акцизна стока за која е избегнато плаќање давачки од 379 илјади денари. Запленетата стока согласно законските прописи ќе биде предадена во Агенцијата за управување со одземен имот, а против лицето ќе биде поднесена кривична пријава заради прекршување на Кривичниот законик“, велат од Царина.

Спречени се и обиди за криумчарење на 44 штеки цигари, по извршени контроли на камиони на граничен премин „Богородица“ и на „Меџитлија“.

„Притоа 38 штеки цигари без акцизни маркички се запленети во два случаи на извршена контрола на товарни моторни возила со македонски регистарски таблички на влез во државата на граничен премин Богородица. Останатите 6 штеки цигари без акцизни маркички се откриени при контрола на камион со македонски регистарски таблички, управувано од македонски државјанин пријавен за влез во државата на граничниот премин Меџитлија. Против сторителите се поведени соодветни постапки“, стои во соопштението на Царина.

814 парчиња детска спортска облека се запленети од страна на мобилни царински тимови, поради сомневање дека повредуваат права од интелектуална сопственост.

„Случајот е откриен при контрола на стока со потекло од Кина сместена во јавен царински склад, наменета за фирма од Тетово. Поведена е постапка за утврдување на оригиналност на стоката“, информираат од Царина.

На магистралниот пат граничен премин Делчево – село Звегор откриени се и запленети 105 резервни делови за возила и 8 литри моторно масло. За непријавените автоделови за кои возачот изјавил дека се негова сопственост, истиот не поседувал документи за потекло и платени увозни давачки.

Исто така, на Граничниот премин „Богородица“ во контрола на автомобил со грчки регистарски таблички, управуван од грчки државјанин, пријавен за влез во државата, биле пронајдени и одземени резервни делови биле и 29,5 литри течност за чистење за машини за прехрана.

Витамини, сумплементи, храна за домашни миленици и 5 штеки цигари во вкупна вредност од 156 илјади денари, биле пронајдени во автомобил со косовски регистарски таблички управуван од косовски државјанин, пријавен за влез во државата на граничниот премин „Меџитлија“.

Македонски државјанин сакал без да пријави да изнесе од државава 3.800 евра преку граничниот премин „Блаце“.

„Имено при извршена контрола во соработка со полициски службеници, во чантата на патникот биле пронајдени 5.800 евра за кои лицето не поседувало документ за потекло. Согласно законските прописи на возачот му биле вратени 2.000 евра. За сторениот девизен прекршок против возачот е поведена прекршочна постапка“, информираат од Царина.

На „Блаце“, во автомобил управуван од македонски државјанин биле пронајдени 113 парчиња разни производи, меѓу коишто облека, обувки, рачни часовници, козметички производи, авто галантерија и друго.

„На прашање на царинските службеници дали има нешто да пријави за царинска контрола, возачот одговорил негативно и инсистирал побргу да биде пуштен да ја премине граничната линија. Поради сомнение е извршена детална контрола, при што во багажникот биле пронајдени непријавените производи спакувани како поштенски пратки“, информираат од Царина.

href=https%3A%2F%2Fwww.facebook.com%2FCustomsMK%2Fposts%2Fpfbid04DSEWjcCa2ca8K1MxZ9z66hFxB1szSLVwxfeu4MZJh78vYQTg1nWiAt9sp3nSqC5l&show_text=true&width=500″ width=”500″ height=”250″ frameborder=”0″ scrolling=”no” allowfullscreen=”allowfullscreen”>