Ресторанот „Ја, Тате и Бате“ од Неготино реши да подготви вечера од гравче и риба за 300 социјално загрозени луѓе за Бадник.

Ресторанот е во сопственост на семејството Ганчеви, односно таткото Дуле работи со синовите Христијан и Блаже, објави телевизијата „Стар“.

„Подготвуваме оброк за социјално загрозени семејства, за деца со посебни потреби, кој сака може да дојде во гостилница или да ни се јави на телефон за да му доставиме храна до домот“, вели Дуле во разговор за локалната телевизија.

Сопственикот на гостилницата додава дека иако Божиќ е христијански празник, вечера на Бадник ќе добијат сите луѓе кои ќе дојдат во ресторанот, без оглед на религиозната припадност.