Тешко може да се опише чувството кога 100 илјади луѓе молчат, како денеска во Ниш, и тоа во чест на 15-мината кои ги загубија животите на железничката станица во Нови Сад, кога поради пропусти во реновирањето на објектот попушти настрешницата. Студентите денеска од Ниш, градот на Константин Велики, побараа промена на системот во Србија, држава во која ќе нема корупција и во која ќе владее правото.

Во Ниш, во кој традиционално се говори најсимпатичниот дијалект на српскиот јазик, денеска можеа да се слушнат говори од цела Србија. Огромен број белграѓани, новосаѓани, луѓе од Западна Србија, од југот и секако од самиот град поставен по течението на реката Нишава, допатуваа да ги поддржат студентите во нивниот обид да дојдат до правда за жртвите од Нови Сад.

Ниш е град кој вообичаено мириса на скара, поради бројните кафеани и меани во чаршијата, но денеска тие останаа празни, бидејќи луѓето дојдоа за протест, испраќајќи порака до власта дека не се умориле од пешачење по Србија и дека нивните барања не се исполнети.

Организатори на протестите се студентите од Ниш, кои синоќа ги пречекаа своите колеги кои пропешачија од другите универзитетски градови. Тие испратија голем број на пораки до јавноста, предупредувајќи дека нема да сопрат додека од Србија не направат место за живеење во кои ќе се исплати да се гради нивната иднина.

Но, во исто време тие испратија јасна порака и до опозициските партии во земјата, ставајќи до знаење дека не им е потребна нивната помош, односно дека ова не е партиски протест. Токму затоа во Ниш не може да се забележи ниту едно знаме или каков било симбол поврзан со партиска или граѓанска организација.

Но затоа, доминираат крајно хумористичните транспаренти коишто ги носат демонстрантите. „Ќе ги носиш боите што најмногу ги мразиш“, пишуваше на еден транспарент, но кој можеше да се види карикатурата на претседателот на Србија, Александар Вучиќ. Тука се прави мошне интересна алузија со црно-белата боја на Партизан, што е несомнено навреда за декларираниот навивач на Црвена звезда.

Студентите на Вучиќ му порачаа и дека е „време за оставка“, но и „време за робија“. Дека е дојдено времето кога тој и неговата „клика“ треба да се симнат од државниот врв.

Но, додека се бараат оставки, никој од неформалните организатори не кажува кој тоа би требало да дојде на власт по Вучиќ. Секој без грешка ќе ви каже дека во Ниш нема место за политичарите, но кога ќе ги запрашате како мислат без политичари да дојдат до промена на власта, тие ги спуштаат рамената.

-Тајната на успехот на протестите е тоа што тука нема политичари, затоа луѓето масно ги поддржуваат. Ако се појави некоја партија, сите ќе се разотидат – вели еден од неформалните лидери на студентскиот протест.

Неговата колешка смета дека протестите ќе траат уште долго време и дека власта нема сама од себе да падне, свесно констатирајќи дека без политичка артикулација нема начин да дојде до мирна и демократска смена на владејачката гарнитура.

-Како ќе ја смениме власта без политичари? Тоа никој жив не го знае. Ова е сенароден протест и единствен преседан во српската историја е востанието на Караѓорѓе. Како ова ќе заврши, навистина не знам, но евидентно е дека власта е разнишана и дека многу работи веќе почнаа да се менуваат во Србија – истакна таа.

Организаторот овој протест во Ниш го нарече „Студентски едикт“, во чест на императорот Константин Велики, кој е родум од овој град. Токму со едиктот на Константин, христијанството е прогласено за една од официјалните религии во Римската империја.

На протестот доминираа српските знамиња, кои се вееја на секој чекор, а можеше да се видат и знамиња со пораките „нема предавање“, како и транспаренти со религиска иконографија.

На плоштадот Крал Милан во центарот на Ниш се одржа театарска претстава, се очекува музичкиот хепенинг, како и јавното обраќање на студентите, кои беспрекорно го организираат целиот настан.