Меѓународната организација „Репортери без граници“ (РСФ) документирала 34 физички напади врз новинари и медиумски работници во Србија за помалку од два месеци, главно за време на антикорупциските протести. Според податоците, бројката ги надминува сите годишни статистики за вакви инциденти од најмалку 2020 година, а само оваа година досега се регистрирани 65 случаи – рекорд во историјата на евиденцијата на Независното здружение на новинари на Србија (НУНС).

Еден од најнасилните напади се случил на 13 август во Нови Сад, кога новинарите Жарко Богосављевиќ и Никола Билиќ биле претепани со метални прачки од поддржувачи на владејачката Српска напредна партија (СНС). Билиќ со тешки повреди на главата морал итно да биде хоспитализиран.

Од вкупно 34 регистрирани случаи, 14 биле извршени од поддржувачи на СНС, а 20 од полицијата. РСФ предупредува дека во просек, еден новинар во Србија е нападнат на секои два дена.

Павол Шалај, раководител на канцеларијата на РСФ за ЕУ и Балканот, истакна дека „пасивноста на српските власти – и потенцијалното соучество – се некомпатибилни со амбицијата за членство во ЕУ“. Организацијата апелира до Европскиот парламент и земјите-членки како Германија и Франција да испратат силна порака до Белград, пишува Нова.рс.

Нападите врз новинари, како и бројните смртни закани, се поттикнати од агресивната реторика на претседателот Александар Вучиќ и провладините медиуми, кои независните телевизии Н1 и Нова С дури ги етикетираа како „терористи“. Србија моментално се наоѓа на 96-то место од 180 држави во светскиот Индекс за слобода на медиумите на РСФ – најниска позиција во регионот на ЕУ и Балканот.