Шведска останува посветен партнер на Северна Македонија на патот кон ЕУ, порача шведската амбасадорка Ами Ларсон Џаин на денешната тркалезна маса за реформската агенда за членство во Европската Унија на земјава.

Таа нагласи дека реформската агенда не е само усогласување со критериумите на ЕУ, туку во суштина е подобрување на секојдневниот живот на граѓаните.

„Шведска останува посветен партнер за членството на Северна Македонија во ЕУ. Заедно со Швајцарија се стремиме да ги зајакнеме демократските институции, да поттикнеме владеење на правото и да го унапредиме доброто владеење. Реформската агенда не е само усогласување со критериумите на ЕУ, туку во суштина е подобрување на секојдневниот живот на граѓаните. Нуди рамка за градење на пофер, позелено и понапредно општество. Во целиот овој процес важна улога има активната вклученост на младите, граѓанските организации и медиумите“, рече амбасадорката Ларсон-Џаин.