Вкупно 53 компании се дел од првиот инвестициски бран проектиран на 1,9 милиони евра од кои 1,5 милион обезбеди државата во соработка со Светска банка, а за останатите 400.000 евра ќе се погрижат претприемачите.

Од добитниците на финансиска поддршка, 80 отсто првпат аплицирале за ваков вид помош од државата, 55 отсто се компании понови од една година, 45 проценти се основани и водени од жени, а 90 отсто се микро претпријатија. Во однос на секторите, 40 проценти се од ИТ, а останатите се од областа на технологијата, здравтството, земјоделството, маркетингот, текстилот, креативните индустрии. Повторно, доминираат стартапи од главниот град, помалку има од внатрешноста.

Вицепремиерката за економски прашања, Мила Царовска и директорот на Фондот за иновации и технолошки развој (ФИТР), Јован Деспотовски, истакнаа дека овој втор јавен повик за поддршка на стартапи на кој има 30 отсто повеќе апликации од ланскиот повик, потврди дека младите имаат доверба во институциите, но и желба да отворат и да водат бизнис во земјава.

Деспотовски го посочи како особено важен фактот дека 90 отсто од оние што добија поддршка се микро комапнии што веќе вработуваат 220 млади луѓе, а се планира отворање работни места за плус 150. Се работи за работни места со високи примања од 40.000 денари во просек.

Директорот на ФИТР кој рече дека е можно наредниот месец да се објави следниот повик за стартапи, ги охрабри оние што овојпат аплицираа, но не добија. Рече дека ќе се заложи нивните барања да бидат повторно разгледани.