Вкупно 12.824 домаќинства во Македонија пијат вода во шишиња, покажаа податоците од најновата објава на пописните резултати 2021 година на Државниот завод за статистика. Сепак, овие бројки не детализираат дали овие граѓани одбиваат да пијат вода од јавните водоводи затоа што не веруваат во нејзината исправност или едноставно немаат друг пристап до овој важен ресурс. Некои други истражувања на темата, сугерираат дека заради прекини во водоснабдувањето и лошиот квалитет на водата за пиење, граѓаните се приморани да купуваат флаширана вода, што е дополнително финансиско оптоварување во време на економска криза.

Она што паѓа во очи се и податоците дека во 21 век, 567 македонски домаќинства, полнат вода за пиење од улична чешма која се напојува од јавен водовод, а на дури 4.720 семејства, единствен извор им се уличните чешми од кои тече вода од посебен извор. Во Македонија виреат и копаните бунари, а од нив се снабдуваат вкупно 4.839 семејства. Пописот 2021 година, нотира и дека вкупно 547.114 домаќинства во Македонија се снабдуваат со вода за пиење со приклучок на јавен водовод. Од нив околу две третини или 375.805 домаќинства се во градските средини, а остатокот или 171.309 селски домаќинства пијат вода од јавен водовод. Има и такви кои добиваат вода со приклучок на сопствен хидрофор, а така се изјасниле 24.229 домаќинства.

– Достапните податоци за пристапот до централизирано снабдување со вода за пиење во Македонија посочуваат на висок степен на покриеност на територијата на државата. 88,9 проценти од домаќинствата се снабдуваат со вода за пиење преку градски систем. Меѓутоа, овие податоци посочуваат и на тоа дека дури 11,1 проценти од домаќинствата немаат пристап до хемиски и биолошки проверена вода за пиење. Дополнително, значајна разлика се забележува во пристапот до јавен водовод помеѓу домаќинствата, односно граѓаните во зависност од местото на живеење. Така, во Скопскиот регион има најголема покриеност, од околу 91 процент. Од друга страна пак, помеѓу 25 и 34 проценти од домаќинствата од Североисточниот, Југозападниот и Полошкиот регион немаат пристап до јавен водовод – објави лани Платформата за истражувачко новинарство и анализи ПИНА.

Иако се бележи намалување на национално ниво од 1,48 отсто на процентот на неприходувана вода, сепак и лани имало општини во кои загубите на вода за пиење изнесувале неверојатни 92 отсто од вкупното количество што е произведено во водоводните системи, се наведува во Годишниот извештај на Регулаторната комисија за енергетика и водни услуги за 2021 година.
Податоците на РКЕВУ покажуваат дека лани количеството на вода на влез во системите за водоснабдување се намалила за 6,96 отсто, додека процентот на фактурирана вода се зголемил од 38,06 отсто во 2020 година, на 39,54 отсто во 2021 година. За Меѓународната асоцијација на води, прифатлив процент на загуби на вода за пиење во водоводните системи треба да е под 30 проценти.

Во 2021 година, имало 77 даватели на водни услуги. Водната услуга снабдување со вода за пиење или водоснабдување во подрачјата со над 10.000 еквивалент жители во Република Македонија, ја даваат вкупно 29 даватели на водни услуги, покривајќи ги делумно или целосно нивните потреби. Според податоците на РКЕ, водната услуга во подрачјата со под 10.000 еквивалент жители во Македонија, ја даваат вкупно 38 даватели.

Според податоците од јавните претпријатија во 2021 година, најскапа вода пиеле жителите на Кочани (43,92 денари за кубик), Свети Николе (38 денари за кубик) и Берово (34, 37 денари за кубик).