Крцкави однадвор и меки однатре, печените макарони ги будат сите сетила на секоја трпеза!

Без разлика дали сте љубител на поинтензивни вкусови или преферирате понеутрални оброци, печените тестенини ќе ги задоволат вашите потреби. Едноставни за подготовка, неодоливо вкусни и примамливи по изглед, печените тестенини ги освоија срцата на многу гурмани.

Доколку сте останале без идеи во кујната, а барате рецепти кои ќе ги подготвите со само неколку состојки на брз и едноставен начин, во го предлагаме овој рецепт што уште повеќе ќе ве инспирира.

Состојки:

– 500 грама макарони

– 200 грама маринирани печурки

– 300 грама чадено свинско месо

– 1/2 ќесичка крем-супа од печурки

– 1 мала кисела павлака

– 200 грама кашкавал

– сол, масло за јадење, оригано

Подготовка:

Во тенџере сипете вода и сол и почекајте да зоврие. Откако водата ќе почне да врие, ставете ги макароните да се варат околу 5 минути.

Додека чекате да омекнат, во тавче сипете масло и во него пропржете ги заедно печурките и чаденото свинско месо. Откако ќе поруменат, ставете ја киселата павлака и потребните зачини и оставете ги заедно пет минути да се динстаат.

Кога макароните ќе се сварат, исцедете ги од водата и ставете ги во садот во кој планирате да ги печете.

На страна, во чаша, изматете ја смесата од крем-супата и додајте ја во макароните, потоа додајте ја и смесата со печурки и павлака. Убаво измешајте и ставете ги да се печат во претходно загреана рерна на температура од 200 степени околу 10 минути.

Пред крај, одозгора изрендајте кашкавал и вратете ги макароните да се допечат. Оставете ги во рерна само една до две минути, односно онолку време колку што е потребно за да се растопи кашкавалот.