Крушата е овошје кое многу брзо го задоволува гладот, а воедно дава сила и потребна дневна енергија. Витамините Б од крушите му помагаат на телото да се справи со стресот бидејќи го хранат нервниот систем и учествуваат во процесот на добивање енергија од јаглехидратите.
Овој период од годината е исклучително богат со неодоливи сезонски производи, па сега е вистинското време да бидете креативни во кујната и да експериментирате со есенските плодови и вкусови.

Ако обожавате добри салати, богати со текстура и вкусови, оваа есенска салата несомнено ќе ви ги исполни очекувањата. Слатката круша, преливот од сенф, крцкавите оревчиња и кремастото сирење горгонзола создаваат превкусно есенско јадење, на кое нема да можете да му одолеете.

Состојки:
За салатата:

– 2 помали зрели круши, излупени и исечкани
– 60 г сирење горгонзола, здробено
– околу 200 г мешана зелена салата, млад спанаќ, рукола
– околу 20 ореви

За преливот:

– 2 лажици црвен вински оцет
– 1/2 лажиче сенф
– 1 лажиче мед
– 1/4 лажиче сол
– свежо мелен бибер
– 3 лажици маслиново масло

Подготовка:

1. Во помала чинија измешајте оцет, сенф, мед, сол и бибер. Додајте маслиново масло и изматете.

2. Во поголем сад измешајте зелена салата, круши, сирење горгонзола и ореви.

3. Пред самото послужување, додајте го преливот во салатата и убаво измешајте. Послужете ја веднаш.