Класичните чоколадни колачи се меѓу омилените десерти во светот, а најчесто овој мек кафеав деликатес се подготвува со помош на бело брашно. Сепак, не мора секогаш да биде така, бидејќи постојат сѐ повеќе брзи рецепти за чоколадни торти без оваа состојка.

За сите љубители на чоколадото го имаме совршениот рецепт не ви треба многу време или вештини, а камоли состојки: ви требаат само три. Многу вкусен десерт за малку пари. Ниту грам брашно нема да ви треба за оваа сочна чоколадна убавица.

Состојки:

– 175 грама чоколадо
– 140 грама путер
– 7 јајца

Подготовка:

Чоколадото растопете го на пареа. Пред крајот додадете го путерот (кој претходно сте го исечкале на коцки). Мешајте додека целосно не се растопи и соедини.

Одделете ги белките од жолчките. Изматете ги жолчките и додадете ја смесата од чоколадо и путер, нежно мешајќи.

Изматете ги белките во форма на снег и додавајте лажица по лажица и нежно мешајте.

Кога ќе добиете единствена, соединета смеса, сипете ја во калап намачкан со путер, каде претходно сте ставиле хартија за печење. Покријте со фолија.

Печете 25 минути во загреана рерна на 150 степени. Тортата е готова кога ќе омекне во средината, а однадвор ќе има крцкава кора.

Кога ќе се излади, украсете по желба – сезонско овошје, рендано чоколадо, кокосово брашно, па ставете го во фрижидер да се излади.